In gottes namen, amen. Allen den si kunt getan, die disen brief lesent alder hoerent lesen, das der jerrode unde der stôs, der
enswischan dem gozhuse von Pfaevaers ain halp und dem hern Hainrich von Wildenberc des vorgenanten gozhuses
voggete ze Ragaezh ander halp was, uf des vorgenanten gozhuses maiers und viztuͦmes rehten und gerihten in dem dorf
ze Ragaezh und uf den sunderlu̍ten, die spitalaer, kerzaer, kameraer und amptlu̍te sint, bi dem âide mit rehter urtâil geschlihtet
und gerihtet ist, also das wir .. von Bu̍rgelon und von Valendawes her Ruͦdolf schidelu̍te gegeben und erwellet des vor
ge
nanten voggetes halp dar zuͦ, und wir Hainr. von Schellenberc und Gunthalm von Swarzenhorn ritere schidelu̍te gegeben und
erwellet des vorgenanten gozhuses halp dar zuͦ, und ich Egelolf von Aspermunt riter ain gemainer und ain ober man gegeben
und erwellet und gebetten von bâiden vorgenanten tâilen darzuͦ, nach baider tâil fu̍rleggunge und antvu̍rte bi dem âide
ertâi
let han, das ain abbet von Pfaevaers sol maier und viztuͦm sin und aller reht und gerihte ze Ragaezh al dur das jâr, âne
maien gedinge, gewaltic wesen, diu ain mâier und ain viztuͦm von alter her hat gehan alder ze rehte haben sol alder swem ain
ab
bet diu reht und diu geriht an siner stat empfilhet. Dar nach han wir vorgenanten schidelu̍te nach baider vorgenanter tâil
fu̍rleggun
ge und antvu̍rte bi dem aide ertâilet, das alle spitalaer, kerzaer kamerer und amptlu̍te, swer die sint und swa die sint, ainen abbet
sunderlich hoerent an und sunt ze reht im dienen. So han wir vorgenanten schidelu̍te umbe Johannesen von Vilters und sine
ge
schlaehte, die spitalaer und kerzaer sint, nach baider tail fu̍rleggunge und antvu̍rte bi dem aide ertailet. Mac der vorgenant vogget
mit zwain semperen mannen unversprochenen, die uber aigen und uber lehen sprechen munt und sunt, den er gebieten nit en mac,
das sin hant si diu dritte, beziugen und behan, das der vorgenanter Johannes und sin geschlaehte mit abbet Cuͦnrates willen, der nu ist,
mit ainem rehten schâide wurdint dem vorgenantem voggete ze voggetlu̍ten geschiket und geschâiden ze dienende im alse ander
sine voggetlu̍te, die wil der vorgenante abbet Cuͦnr. lebet und fu̍rbas nit, des sol der vogget gemessen. Dar nach han
wir vorgenanten schide[lu̍te] ertâilet bi dem aide nach baider tail fu̍rleggunge und antvu̍rte umbe Cuͦnzen den banwarten und
Uͦlrichen den bruͦder sin, m[ac der] vorgenante vogget erziugen und behan mit zwâin semperen mannen unversprochenen, die sprechen
munt und sunt uber aig[en u]nd uber lehen, den er gebieten nit en mac, dz sin hant diu dritte si, dz die vorgenanten gebruͦder
Cuͦnz und Uͦlrich mit ai[nes a]bbetes und sines conventes willen, die do warent, und mit aines voggetes gunst, der do vogget was,
wurdint mit ainem reht[en] und redelichem wehssel in des vorgenanten voggetes voggetâi ze voggetlu̍ten gegeben, des sol der
vogget geniessen. So ha[n] wir vorgenanten schidelu̍te nach baider tail fu̍rleggunge und antvu̍rte âne urtail geschâiden und
geschlihtet, dz der vorgenant vogget ze Lasên in des vorgenanten gozhuses alpe von des hoves rehten ze Saluaninnes
fiûnf
zig melkiͧ rinder triben sol âne allen vâr und diu schâf und die gaisse, die dar zuͦ hoerent, die der lu̍te des hoves sint, dem
goz
huse in der selbun alpe sin reht ninder ze boeserenne und sinen zins ze rihtenne nach rehte. Das dis alsus geschlihtet si und
bi dem aide ertâilet, alse vor der brief beschâiden hat, dar umbe han wir vorgenanten schidelu̍te Hainr. von Schellenberc,
Gunhalm von Swarzenhorn ritere, des vorgenanten gozhuses halp ze schidelu̍ten erwellet, und ich Egelolf von Aspermunt
riter, ain gemainer und ain ober man jêtwederthalp, gegeben dar unseriu insigel ze ainem urku̍nde der vorgesprochenon
urtailen und schidungen an disen brief gehenket und gegeben. Wir grave Ruͦ. von Werdenberc und wir H. von Gu̍ttingen, wan
wir da dis beschach dabi waren, dar umbe han wir dur abbet Cuͦnr. bet ze ainer beziͧgunge der vorgesprochenen urtailen an disen
brief unseriu insigel gegeben und gehenket. Dis alse vor geschriben ist beschach ze Ragaezh des jares do man von gottes
gebu̍rte zalte zwelf hundert und niͧniu und niͧnzic jâr an sante Fidun tac vor disen vorbenanten herren und schidelu̍ten,
vor dem convent hern Jacob dem tegan, Ruͦ. von Hardegge, E. von Wolffurt, Her. von Schoenstain, closterherren, vor dem von
Sigeberc dem erzpriester, vor dem hern C. von Walastade, vor hern Her. dem liͧtpriester, da was och bi her Brûne von Ru̍zu̍nnes, .. der
von Muntalt, der von Hermensdorf, der von Úrikon, der von Richenstain, her Sifrit, her E. von Funtenawes, der von Berge,
her Uͦl. von Niͧzu̍ders, her Uͦl. von Trisun, her Dietrich Schorant, her H. Vederspil, rittere, Albreht Schorant, .. Rosenberc, G. von
Twingenstain, Johannes von Trisun und ander ersam lu̍te, baidiu pfaffen, rittere und knehte.